Monakoda knyaz II Albertin 29 yaşlı bibisi nəvəsi Antuan de Massinin meyiti aşkarlanıb.
İsti.press xəbər verir ki, bu barədə “Monaco-Matin” nəşri məlumat yayıb.
Bildirilib ki, Antuan ölümündən qısa müddət əvvəl gecə klubundan çıxarkən görülüb. Onun sərxoş vəziyyətdə olduğu ehtimal edilir. Ertəsi gün ailə naharına gəlmədikdə yaxınları narahat olaraq polisə müraciət ediblər. Bir neçə saat sonra onun meyiti Sovər villasının arxasındakı parkda tapılıb.
Təhlükəsizlik kameralarının görüntülərini araşdıran istintaqçılar hadisə yerinin yaxınlığında olan şəxsin kimliyini müəyyənləşdirərək onu saxlayıblar. Yerli KİV-in yazdığına görə, saxlanılan şəxs Monakoda yaşayan Ukrayna vətəndaşıdır. Lakin prokurorluq bu məlumatı hələlik təsdiqləməyib.
İstintaq orqanları hadisənin bədbəxt hadisə ola biləcəyi ehtimalını da nəzərdən keçirirlər. Versiyalardan birinə əsasən, Antuan avtomobil yolundan aşağıda yerləşən bağlara yıxılmış ola bilər. Onun dəqiq ölüm səbəbi araşdırılır.
Qeyd edək ki, Antuan baron Kristian Lui de Massi və Sesil Jelabalın oğlu, şahzadə Antuanettanın nəvəsi olub. Onun rəsmi titulu olmayıb və o, əsasən ictimaiyyətdən uzaq həyat sürüb.
Antuan gəncliyində peşəkar tennisçi olub. İdman karyerasını başa vurduqdan sonra sahibkarlıq fəaliyyətinə başlayıb.
Knyaz II Albert və həyat yoldaşı, knyaginya Şarlen də hadisə ilə bağlı açıqlama yayıblar. Knyazlıq sarayının adından yayılan yazılı bəyanatda onlar mərhumun ailəsinə və yaxınlarına başsağlığı verib, onun idman sahəsindəki nailiyyətlərini də qeyd ediblər.
