Aparıcı Kamilə Babayeva bir müddət əvvəl dünyasını dəyişən anası Münəvvər xanımla bağlı daha bir paylaşım edib.
İsti.press xəbər verir ki, aparıcı sosial media hesabında anası ilə bağlı duyğusal fikirlərini bölüşüb.
“Ana, elə bilirdim, hər gün səninlə bir hekayə paylaşacağam. Sonra başa düşdüm ki, sən bir hekayəyə sığacaq qız deyilsən axı. Öz doğru bilib inandığın hər şeyə sona qədər sədaqət göstərdin. Hamıdan fərqli, rəngli, bəzən təlatümlü. Bu həyatı qorxmadan yaşadın. Bilirsən, mən də artıq qorxmuram.
Bu çətin günlərdə yalan yazıb bizi incitmək istədilər. Onlara da sənin ürəyinlə baxıb, bağışladım. “Kamilə, onlar da bir cür yazıqdır” deyərdin mənə, mən də səninlə uzun-uzadı mübahisə edərdim. Bilirsən, böyüdüm və bağışladım. Allah keçsin günahlarından.
Yaxşı baxıb insanlara inanmağı, yaşamağı, sevməyi, ümid edib yeni baharları, yeni səhərləri, sabahları sevgiylə qarşılamağı seçdim. Elə sənin kimi…
Hər sağollaşanda belə deyərdin: “Kamilə, ruhunu sərin saxla və içindəki o balaca qızı qoru. O səninlə olduqca, hələ çox təəccüblənib, çox gülüb, çox heyrətlənəcəksən. Qoy səni hamı başa düşməsin. Bu, vacib də deyil. Əsas içindəki o balaca qızı qoru, möcüzələrə inan”.
Bilirsən… Möcüzələr yoxluğunda da varmışsan kimi davam edir. Hələlik, Münəvvər qız…”, – deyə Kamilə Babayeva yazıb.
