28 yaşlı çinli milyonçu model Abbi Çoyun keçmiş həyat yoldaşı Aleks Kvonq Honkonqda məhkəmə qarşısına çıxarılıb.
İsti.press xəbər verir ki, bu barədə “People” məlumat yayıb. Bildirilib ki, 31 yaşlı Aleks Kvonq 2023-cü ilin fevralında keçmiş həyat yoldaşını öldürməkdə və onun qalıqlarını gizlətməkdə ittiham olunur.Abbi Çoyun keçmiş əri Aleks Kvonq, qaynı Entoni Kvonq və qayınatası Kvonq Kau qətldə ittiham edilirlər. Təqsirləri məhkəmədə sübuta yetiriləcəyi təqdirdə onları ömürlük həbs cəzası gözləyir.
Qeyd edək ki, Abbi Çoi 21 fevral 2023-cü ildə itkin düşüb. İki gün sonra onun parçalanmış qalıqları Honkonqun Tay Po rayonunun Lonq Mey kəndində yerləşən evdə aşkarlanıb.
Müstəntiqlər evdə mişar və ətçəkən maşın tapıblar. Modelin qalıqlarının bir hissəsi qazanda və soyuducuda, kəlləsinin isə ayrıca qazanda aşkarlandığı bildirilib.
Hüquq-mühafizə orqanları daha sonra Aleks Kvonqu Honkonqdan çıxmağa cəhd edərkən saxlayıb. Ardınca onun qardaşı və atası da həbs olunub.
