Türk klassik musiqisinin məşhur nümayəndəsi Bülent Ersoy konsert zamanı balaca pərəstişkarlarına etdiyi jestlə diqqət çəkib.
İsti.press xəbər verir ki, sənətçi Ataköy Marinada baş tutan konsertdə səhnəyə çıxıb. Qara daş-qaşlı libası və brilyantları ilə də diqqət çəkən Bülent Ersoy gecənin ən yaddaqalan anlarından birini uşaqlarla yaşayıb.
Konsert zamanı uşaqlardan biri sənətçidən onunla şəkil çəkdirməsini istəyib. Ersoy balaca pərəstişkarının xahişini qəbul edərək onu səhnəyə dəvət edib. Daha sonra başqa bir uşaq da foto çəkdirmək üçün səhnəyə yaxınlaşıb. Sənətçi onu da yanına çağırıb.
Birlikdə şəkil çəkdirən uşaqlara Bülent Ersoy daha sonra sürpriz edib. O, çantasından böyük məbləğdə pul çıxararaq köməkçisinə verib və vəsaitin iki uşaq arasında bölüşdürülməsini istəyib.
Sənətçinin balaca pərəstişkarlarına xərclik verməsi onların böyük sevincinə səbəb olub. Uşaqlardan biri Ersoya sarılaraq təşəkkür edib.
Həmin anların görüntüləri sosial şəbəkələrdə də yayılıb. Bülent Ersoyun uşaqlara göstərdiyi diqqət və jesti konsert iştirakçıları tərəfindən alqışlarla qarşılanıb.
